پنجاب حکومت کا اہم اقدام،الیکٹرانک اور پرنٹ میڈیا کی ادائیگیاں ورکرز کی تنخواہوں سے مشروط کرنے کا فیصلہ

وزیر اطلاعات عظمیٰ بخاری کی ہدایت پر صحافیوں کے مسائل کے حل کے لیے قائم کی گئی کمیٹی کا دوسرا اہم اجلاس سیکرٹری اطلاعات طاہر رضا ہمدانی کی صدارت میں منعقد ہوا۔ اجلاس میں ڈی جی پی آر غلام صغیر شاہد اور مختلف صحافتی تنظیموں کے نمائندگان نے شرکت کی۔اجلاس کے دوران صحافیوں کو درپیش مسائل کے حل کے لیے کئی اہم اور تاریخی فیصلے کیے گئے۔ حکومت نے فیصلہ کیا کہ الیکٹرانک اور پرنٹ میڈیا اداروں کو سرکاری ادائیگیاں اُن کے ملازمین کو تنخواہوں کی بروقت اور باقاعدہ ادائیگی سے مشروط ہوں گی۔ اگر ادارے تنخواہیں وقت پر ادا نہ کریں تو ڈی جی پی آر کو اُن اداروں کو ادائیگی روکنے کا اختیار حاصل ہوگا۔ اس کے علاوہ تمام میڈیا ادارے ڈی جی پی آر کو ہر ماہ اپنے ورکرز کو دی گئی تنخواہوں کا سرٹیفکیٹ جمع کرانے کے پابند ہوں گے۔
مزید برآں، صحافیوں کو جاری کیے جانے والے ایکریڈیٹیشن کارڈز کے لیے لازمی صحافتی تجربے کی مدت 10 سال سے کم کر کے 5 سال کر دی گئی۔ اجلاس میں تمام صحافتی تنظیموں نے جعلی (ڈمی) اخبارات کے خاتمے کے لیے ڈی جی پی آر کی مکمل حمایت کا اعلان بھی کیا۔اجلاس میں صدر اے پی این ایس سرمد علی، صدر سی پی این ای کاظم خان، سیکرٹری ایمنڈ حافظ طارق محمود، سینئر نائب صدر سی پی این ای ایاز خان، اور اے پی این ایس کے ممبران نور اللہ اور محسن ممتاز نے شرکت کی۔