کینسر کے علاج میں انقلابی پیش رفت، وزیراعلیٰ پنجاب نے میو اسپتال میں جدید کو-ابلیشن سینٹر کا باقاعدہ افتتاح کر دیا۔

وزیراعلیٰ پنجاب مریم نواز کے دورۂ چین کے مثبت نتائج سامنے آنا شروع ہوگئے ہیں۔ میو اسپتال میں کینسر کے علاج کے لیے جدید کو-ابلیشن سینٹر کا افتتاح کر دیا گیا۔سینئر ریڈیالوجسٹ ڈاکٹر شہزاد کریم بھٹی نے مشین کے طریقۂ کار پر بریفنگ دیتے ہوئے بتایا کہ کو-ابلیشن مشین کینسر کے خلیوں کو پہلے مائنس 198 ڈگری پر مائع نائٹروجن کے ذریعے منجمد کرکے ختم کرتی ہے، اس کے بعد دوسرے مرحلے میں انہیں 83 ڈگری تک گرم کر کے مکمل طور پر تلف کیا جاتا ہے۔ یہ آپریشن تقریباً 60 سے 120 منٹ تک جاری رہتا ہے اور مریض چند گھنٹوں میں چلنے پھرنے کے قابل ہو جاتا ہے۔ ایک مریض کے علاج پر تقریباً 16 لاکھ روپے لاگت آتی ہے۔ فی الحال اس مشین کے ذریعے جگر، پھیپھڑے اور بریسٹ کینسر کے ابتدائی مرحلے کا علاج کیا جا رہا ہے۔اس موقع پر وزیراعلیٰ مریم نواز نے کو-ابلیشن ٹریٹمنٹ کے بعد صحت یاب ہونے والے پہلے پانچ مریضوں سے ملاقات کی۔ اپنے خطاب میں انہوں نے کہا کہ کینسر کے علاج کی یہ جدید ٹیکنالوجی سب سے پہلے پنجاب میں متعارف کرائی گئی ہے۔ چین میں کینسر کے علاج کی سہولیات کا قریب سے مشاہدہ کیا اور جدید مشینری پاکستان لانے کی خصوصی ہدایات دیں۔ انہوں نے مزید کہا کہ کینسر کے مریضوں کو جدید علاج کی سہولیات فراہم کرنا حکومت کی اولین ترجیح ہے۔