اسرائیلی فوج نفسیاتی مسائل کا شکار،20ہزار فوجی طبی بحالی کے مراکز میں زیر اعلاج

اسرائیلی حکومت کی وزارت جنگ نے اعلان کیا ہے کہ 20 ہزار اسرائیلی فوجی اس وقت ری ہیبیلیٹیشن مراکز میں زیر علاج ہیں۔اس رپورٹ کے مطابق، سن 2028 تک معذور  فوجیوں کی تعداد بڑھ کر 1 لاکھ تک پہنچ جائے گی۔
ہاریٹز اخبار نے اسرائیلی فوج کا حوالہ دیتے ہوئے بتایا ہے کہ طبی مراکز میں خدمات حاصل کرنے والے 55 فیصد فوجیوں کو غزہ میں جنگ میں شامل ہونے کے نتیجے میں شدید نفسیاتی مشکلات کا سامنا ہے۔ادھر یدیعوت آحارنوت اخبار نے لکھا ہے کہ جنگی حادثے کے شکار کم سے کم 10 ہزار اسرائیلی فوجیوں کو شدید اسٹریس اور اس کے نتیجے میں پیش آنے والے ذہنی اور نفسیاتی مسائل کا سامنا ہے جن میں 3769 فوجیوں کے نام کو باضابطہ طور پر ذہنی مریض کے طور پر درج کر دیا گیا ہے۔بتایا گیا ہے کہ ذہنی مریض بننے والے اسرائیلی فوجیوں کی تعداد رواں سال کے آخر تک 1 لاکھ سے تجاوز کرجائے گی۔یہ ایسی حالت میں ہے کہ سن 2014 میں غزہ پر حملے کے دوران نفسیاتی امراض کا شکار صیہونی فوجیوں کی تعداد 159 تھی۔رپورٹ کے مطابق آدھے سے زیادہ ذہنی امراض کا شکار صیہونی فوجیوں کی عمر 30 سال سے کم ہے اور ان میں سے کم سے کم 12 ہزار مستقل طور پر کار و بار کی مارکیٹ سے باہر رہ جائیں گے جس کے بھاری معاشی نتائج بھی برآمد ہوں گے۔