گلگت کے نواحی علاقے دنیور سے 14 سالہ ارشاد کو لاپتہ ہوئے 23 روز گزر گئے، مگر قانون نافذ کرنے والے ادارے ابھی تک اسے ڈھونڈنے میں کامیاب نہیں ہو سکے۔ والدین کا کہنا ہے کہ وہ شدید کرب اور بے بسی میں ہیں اور حکام سے اپیل کرتے ہیں کہ ان کے بیٹے کو فوری طور پر بازیاب کرایا جائے.
محلہ شروٹ دنیور کے رہائشی ابراہیم ولد دوست محمد نے تھانہ دنیور میں درخواست جمع کرائی ہے کہ ان کا بیٹا ارشاد حسین مورخہ 25 اگست 2025 کو آٹا لینے گھر سے گیا تھا۔ وہ واپس آیا لیکن کچھ دیر بعد دوبارہ گھر سے نکلا اور پھر لوٹ کر نہ آیا۔والد کے مطابق، رشتہ داروں اور قریبی حلقوں میں تلاش کے باوجود بیٹے کا کوئی سراغ نہ ملا۔ پولیس کو بھی اطلاع دی گئی لیکن ابھی تک پیش رفت نہیں ہوسکی۔
ابراہیم نے اپنی درخواست میں مؤقف اختیار کیا ہے کہ انہیں قوی شبہ ہے کہ ان کے بیٹے کو نامعلوم افراد نے اغوا کیا ہے۔ انہوں نے پولیس سے مطالبہ کیا کہ فوری کارروائی کرتے ہوئے ملزمان کو گرفتار کیا جائے اور بچے کی بازیابی یقینی بنائی جائے۔
