بنگلہ دیش کا چین سے 20 جے-10 سی (J-10C) لڑاکا طیارے خریدنے کا فیصلہ

بنگلہ دیش کی حکومت نے اپنی فضائیہ کو جدید بنانے اور قومی فضائی دفاع مضبوط کرنے کے لیے چین سے 20 عدد جے-10 سی (J-10C) لڑاکا طیارے خریدنے کی منظوری دے دی ہے۔ اس معاہدے کی مجموعی قیمت تقریباً 2.20 ارب ڈالر (تقریباً 27,060 کروڑ ٹکہ) بتائی گئی ہے، جس میں تربیت، دیکھ بھال اور دیگر متعلقہ اخراجات بھی شامل ہیں۔سرکاری دستاویزات کے مطابق یہ خریداری حکومت سے حکومت (G2G) کی بنیاد پر 2025-26 اور 2026-27 کے دوران مکمل کی جائے گی جبکہ ادائیگیاں دس مالی سال میں اقساط کی صورت میں 2035-36 تک کی جائیں گی۔ چینی ذرائع (گلوبل ٹائمز) اور دفاعی ویب سائٹس (دی وار زون) کے مطابق جے-10 سی، جسے "Vigorous Dragon” بھی کہا جاتا ہے، ایک چوتھی نسل کا ملٹی رول لڑاکا طیارہ ہے جو فضائی و زمینی اہداف دونوں پر مؤثر حملے کر سکتا ہے۔ڈھاکا ٹریبیون کے مطابق یہ طیارہ میخانی رفتار تقریباً میخ 2.2 (تقریباً 2,415 کلومیٹر فی گھنٹہ) تک پہنچ سکتا ہے اور اس کا جنگی رینج تقریباً 1,850 کلومیٹر ہے۔ جے-10 سی دشمن اہداف کو 200 کلومیٹر تک کے فاصلہ سے نشانہ بنا سکتا ہے اور دوسرے طیاروں یا ڈرونز کے ساتھ مل کر نگرانی اور حملہ جاتی مشنز انجام دینے کی صلاحیت رکھتا ہے۔ سرکاری تخمینے کے مطابق ہر طیارے کی بنیادی قیمت 6 کروڑ ڈالر رکھی گئی ہے، جس کے مطابق 20 طیاروں کی بنیادی لاگت تقریباً 1.2 ارب ڈالر (14,760 کروڑ ٹکہ) بنتی ہے۔
تربیت، سازو سامان اور ٹرانسپورٹ پر مزید 820 ملین ڈالر (10,086 کروڑ ٹکہ) خرچ متوقع ہے، جبکہ انشورنس، وی اے ٹی، کمیشن، انفراسٹرکچر اور دیگر ضمنی اخراجات ملانے سے کل لاگت تقریباً 2.20 ارب ڈالر بنتی ہے۔
ذرائع کا کہنا ہے کہ بنگلہ دیش کے چیف ایڈوائزر ڈاکٹر محمد یونس نے 26 مارچ کو چین کے چار روزہ دورے کے دوران اس منصوبے پر بات کی تھی اور چینی حکام نے مثبت موقف اختیار کیا۔ بعد ازاں حکومت نے اپریل میں ایک 11 رکنی بین الوزارتی کمیٹی تشکیل دی، جس کی سربراہی ایئر چیف مارشل حسن محمود خان کر رہے ہیں—اس میں چیف ایڈوائزر آفس، وزارت دفاع، وزارت خزانہ، اکنامک ریلیشنز ڈویژن اور وزارت قانون و انصاف کے نمائندے شامل ہیں۔اس کمیٹی کا کام معاہدے کے مسودے کا جائزہ لینا، براہِ راست چینی حکومت یا اس کی نامزد ایجنسی سے خریداری کے امکانات جانچنا، اور مرمت، تربیت، پرزہ جات و ادائیگی کی شرائط پر مذاکرات کرنا ہے۔ ذرائع کے مطابق اگر تمام مراحل منصوبے کے مطابق مکمل ہوئے تو بنگلہ دیش فضائیہ کو 2027 تک جے-10 سی طیاروں کی پہلی کھیپ موصول ہونا شروع ہو جائے گی۔