پاکستان نے انٹرنیشنل کرکٹ کونسل (آئی سی سی) کا وہ غیر مصدقہ دعویٰ مسترد کر دیا ہے جس میں کہا گیا تھا کہ پاکستانی حملے میں 3 مقامی افغان کرکٹر ہلاک ہوئے۔
وفاقی وزیر اطلاعات عطا تارڑ نے ایک بیان میں آئی سی سی کے تبصرے کو متعصب، سلیکٹو اور ناپختہ قرار دیتے ہوئے کہا کہ پاکستان پر بے بنیاد الزام عائد کیا گیا ہے جس کے ثبوت آئی سی سی پیش نہیں کر سکی۔
سوشل میڈیا پلیٹ فارم ایکس (X) پر جاری بیان میں عطا تارڑ نے کہا کہ پاکستان خود سرحد پار دہشت گردی کا شکار ہے، لیکن آئی سی سی کی نئی قیادت جے شاہ کے زیرِ اثر متعصبانہ رویے کو اپنا چکی ہے۔
ان کے مطابق جے شاہ نے نہ صرف آئی سی سی کے بیان کو اپنے اکاؤنٹ سے شیئر کیا بلکہ افغان کرکٹ بورڈ نے بھی وہی مؤقف دُہرایا، جس سے آئی سی سی کی غیر جانب دار حیثیت پر سوال اٹھ گیا ہے۔
دوسری جانب، افغان کرکٹ بورڈ نے حالیہ کشیدگی کے بعد اعلان کیا ہے کہ وہ نومبر میں پاکستان میں ہونے والی سہ ملکی سیریز (Tri-Nation Series) میں شرکت نہیں کرے گا۔
