وزیراعلیٰ خیبر پختونخوا محمد سہیل آفریدی نے کہا ہے کہ کسی کو بھی بند کمروں میں کیے گئے فیصلے عوام پر مسلط کرنے کی اجازت نہیں دی جائے گی۔
سماجی رابطے کی ویب سائٹ ایکس پر جاری اپنے بیان میں وزیراعلیٰ نے بتایا کہ 25 اکتوبر کو ضلع خیبر کی تحصیل باڑہ میں ایک بڑا جرگہ منعقد کیا جائے گا۔ اس جرگے میں تمام سیاسی وابستگیوں سے بالاتر ہو کر قبائلی عمائدین، مشران اور نوجوان شرکت کریں گے۔
انہوں نے کہا کہ قیامِ امن اور عوام کے مستقبل کے فیصلے صوبے کے لوگ خود کریں گے۔ جرگے کا مقصد خیبر پختونخوا کے عوام کے مفاد میں اجتماعی لائحہ عمل طے کرنا ہے۔
وزیراعلیٰ نے اس عزم کا اظہار کیا کہ خیبر پختونخوا کی حکومت بانی چیئرمین کے نظریے اور صوبے کے عوام کے مفاد کے ساتھ کھڑی ہے، اور ہر فیصلے میں عوامی رائے اور شمولیت کو ترجیح دی جائے گی۔
