ہنگو کے علاقے دوآبہ میں پولیس افسران کے قافلے پر آئی ای ڈی حملے کے نتیجے میں تین اہلکار زخمی ہو گئے۔ پولیس کے مطابق حملہ اُس وقت ہوا جب ایس پی انویسٹی گیشن عبدالصمد، ڈی ایس پی ٹل مجاہد اور ایس ایچ او عمران الدین امن کمیٹی کے اجلاس سے واپس آ رہے تھے۔
دھماکے میں ایس ایچ او تھانہ دوآبہ عمران الدین، سب انسپکٹر جہاد علی اور ڈسٹرکٹ اسپیشل برانچ کا اہلکار عابد زخمی ہوئے۔
حملے کے فوراً بعد پولیس اور حملہ آوروں کے درمیان فائرنگ کا تبادلہ بھی ہوا۔ ایس پی انویسٹی گیشن عبدالصمد خان کے مطابق پولیس قافلے کو منصوبہ بندی کے تحت نشانہ بنایا گیا۔
یاد رہے کہ چند روز قبل بھی ہنگو میں ہونے والے ایک بم دھماکے میں ایس پی آپریشنز اسد زبیر تین پولیس اہلکاروں سمیت شہید ہو گئے تھے۔
