افغانستان کی عبوری طالبان حکومت نے اسلام آباد کے جی الیون کچہری میں ہونے والےخودکش دھماکے اور وانا میں کیڈٹ کالج پر ہونے والے حملے کی شدید مذمت کی ہے۔
نجی ٹی وی چینل جیو نیوز کے مطابق افغان وزارتِ خارجہ نے اپنے جاری کردہ بیان میں کہا کہ اسلام آباد میں ہونے والا دھماکا اور وانا کے تعلیمی ادارے پر حملہ نہایت افسوسناک واقعات ہیں، جن کی مذمت کرتے ہیں۔
بیان میں ان حملوں میں قیمتی جانوں کے ضیاع پر گہرے دکھ اور افسوس کا اظہار کیا گیا، جبکہ زخمیوں کی جلد صحتیابی کے لیے دعا بھی کی گئی۔
یاد رہے کہ گزشتہ روز اسلام آباد کے جی الیون کچہری کے باہر خودکش دھماکے میں 12 افراد شہید اور 30 زخمی ہوئے، جب کہ دو روز قبل وانا میں کیڈٹ کالج پر دہشتگردوں نے حملہ کیا تھا۔
سیکیورٹی فورسز نے بروقت کارروائی کرتے ہوئے حملہ مکمل طور پر ناکام بنایا اور چاروں دہشتگردوں کو ہلاک کر دیا۔
سیکیورٹی ذرائع کے مطابق وانا حملے میں ملوث دہشتگرد افغانستان سے رابطے میں تھے، جبکہ وزیرِ اطلاعات عطا تارڑ کا کہنا ہے کہ اسلام آباد اور وانا حملوں سے متعلق شواہد اکٹھے کیے جا رہے ہیں اور یہ ٹھوس ثبوت بین الاقوامی فورمز پر پیش کیے جائیں گے۔
