پاکستان معاشی استحکام اور ترقی کی سمت میں پُرعزم انداز سے آگے بڑھ رہا ہے، جبکہ ایس آئی ایف سی کا مؤثر کردار عالمی سطح پر ملک کی اقتصادی اہمیت کو اجاگر کر رہا ہے۔
لاہور چیمبر آف کامرس اینڈ انڈسٹری میں بیلجیئم کیٹلاگز کی نمائش منعقد ہوئی جس میں بیلجیئم کے سفیر چارلس ایڈسبالڈ وین ڈر گراخت، چیمبر کے صدر فہیم الرحمٰن سہگل سمیت دیگر اہم عہدیداران نے شرکت کی۔
نمائش میں 100 سے زائد بیلجیئم کمپنیوں نے ایرو ناؤٹکس، تعمیرات، ادویات، آئی ٹی اور دیگر شعبوں سے متعلق کیٹلاگز پیش کیے، جبکہ اس موقع پر پاکستان اور بیلجیئم نے دوطرفہ اقتصادی تعاون، تجارتی روابط اور تعلیم و سرمایہ کاری کے شعبوں میں تعاون جاری رکھنے کے عزم کا اظہار کیا۔
تقریب میں اس بات پر زور دیا گیا کہ غیر ملکی سرمایہ کاری نہ صرف مقامی صنعتوں کی ترقی میں مددگار ثابت ہوگی بلکہ روزگار کے مزید مواقع پیدا کرنے کا ذریعہ بھی بنے گی۔
بین الاقوامی تجارتی شراکت داریاں معاشی استحکام، برآمدات میں توازن اور عالمی منڈیوں تک بہتر رسائی کے لیے ضروری قرار دی گئیں۔
ایس آئی ایف سی کی کاوشوں کو بھی سراہا گیا جو غیر ملکی سرمایہ کاری کے فروغ اور عالمی سطح پر پاکستان کے اقتصادی تعلقات کو مضبوط بنانے میں اہم کردار ادا کر رہا ہے۔
