اسلام آباد: وزیراعظم شہباز شریف نے چیف آف ایئر اسٹاف، ائیر چیف مارشل ظہیر احمد بابر سدھو کی مدت ملازمت میں بھی دو سال کی توسیع کی منظوری دے دی ہے۔
بھارت کے خلاف معرکہ حق کے دوران فیلڈ مارشل عاصم منیر اور ایئر چیف مارشل ظہیر احمد بابر سدھو نے اہم کردار ادا کیا تھا۔ ایئر چیف کی قیادت میں پاک فضائیہ کے شاہینوں نے دشمن کے سات جیٹ مار گرائے تھے۔
کچھ روز قبل ایک تقریب سے خطاب کرتے ہوئے ائیر چیف مارشل ظہیر احمد بابر سدھو نے کہا تھا کہ آپریشن ’’بنیانِ مرصوص‘‘ میں پاک فضائیہ نے دشمن کو واضح شکست سے دوچار کیا اور 10 مئی کو دشمن کے دفاعی نظام کو مؤثر طریقے سے نشانہ بنایا۔
انھوں نے کہا تھا کہ فیلڈ مارشل سید عاصم منیر نے اس معرکے میں اہم قائدانہ کردار ادا کیا، جس نے پاک فوج کی پیشہ ورانہ صلاحیتوں اور منصوبہ بندی کو نمایاں کیا۔
یہ تعیناتیاں اور توسیع مسلح افواج میں قیادت کے استحکام اور قومی دفاع کی مضبوطی کے لیے اہم قدم سمجھی جا رہی ہیں۔
