پاک چین اور پاک ایران سرحدوں پر تجارت کو مؤثر اور محفوظ بنانے کے لیے نیشنل لاجسٹکس کارپوریشن (این ایل سی) نے جدید اسکینر سسٹمز نصب کر دیے۔ یہ سسٹمز پاک چین سرحد پر سوست ڈرائی پورٹ جبکہ پاک ایران سرحد پر گبد بارڈر ٹرمینل میں فعال کر دیے گئے ہیں۔
ترجمان این ایل سی کے مطابق جدید اسکینرز محض 22 سیکنڈ میں گاڑیوں کی اسکیننگ کی صلاحیت رکھتے ہیں، جس سے کلیئرنس کے عمل میں نمایاں تیزی آئے گی اور کنٹینرز کے انتظار کا دورانیہ کم ہو جائے گا۔
حکام کا کہنا ہے کہ مصنوعی ذہانت سے لیس اسکینرز بارکوڈز کی درست شناخت کے ساتھ تجارتی سامان کی ساخت کا باریک بینی سے تجزیہ کر سکتے ہیں۔ ہر اسکین کا ڈیٹا تجارتی کارروائیوں میں شفافیت کو بڑھانے میں مددگار ہوگا، جبکہ معائنے کے مراحل میں انسانی مداخلت کم ہونے سے قانونی تجارت مزید مؤثر اور تیز ہو جائے گی۔
این ایل سی کے مطابق اہم تجارتی راہداریوں پر یہ اقدامات مجموعی تجارتی کارکردگی بہتر بنانے میں سنگِ میل ثابت ہوں گے۔ چین اور ایران کے ساتھ بڑھتی ہوئی تجارت کے تناظر میں اس پیش رفت کو نہایت اہم قرار دیا جا رہا ہے۔
تجزیہ کاروں کے مطابق سرحدی انفراسٹرکچر کی جدیدیت پاکستان کے علاقائی رابطوں کے استحکام اور عالمی تجارتی معیار سے ہم آہنگی کی جانب اہم قدم ہے۔
