پاکستان کی ڈیجیٹل معیشت مضبوطی کی نئی منزلیں طے کرنے لگی ہے اور آئی ٹی برآمدات نے نئی تاریخ رقم کر دی۔ ڈیجیٹل شعبہ کی یہ پیش رفت ملکی ترقی کے ایک نئے اور سنہرے دور کے آغاز کی نوید بن گئی ہے۔
ایس آئی ایف سی کی مؤثر پالیسیوں اور حکومتی تعاون کے باعث آئی ٹی برآمدات مسلسل وسعت اختیار کر رہی ہیں اور پاکستان خطے کی ابھرتی ہوئی ڈیجیٹل پاور کے طور پر سامنے آ رہا ہے۔
اسٹیٹ بینک آف پاکستان کی جاری کردہ رپورٹ کے مطابق رواں مالی سال کے صرف پہلے پانچ ماہ کے دوران آئی ٹی برآمدات میں 19 فیصد اضافہ ریکارڈ کیا گیا، جبکہ جولائی سے نومبر 2025 تک آئی ٹی برآمدات کا مجموعی حجم 1.8 بلین ڈالر تک پہنچ گیا۔ نومبر 2025 میں آئی ٹی برآمدات کا حجم 356 ملین ڈالر ریکارڈ کیا گیا جو ملکی تاریخ میں ایک اہم سنگ میل ہے۔
ماہرین کے مطابق آئی ٹی برآمدات میں تیزی نہ صرف قیمتی زرمبادلہ کا ذریعہ ہے بلکہ روزگار کے مواقع، ڈیجیٹل خودمختاری اور ملکی معیشت کے استحکام کی جانب ایک بڑی پیش رفت بھی ہے۔ پاکستانی ٹیکنالوجی انڈسٹری عالمی منڈیوں میں پاکستان کی مثبت اور بااعتماد شناخت کومزید مستحکم بنانے کیلئے سرگرم ہے۔
آئی ٹی سیکٹر کی تیز رفتار ترقی عالمی سرمایہ کاروں کے اعتماد اور ایس آئی ایف سی کی معاونت کا عملی ثبوت ہے۔ معاشی ماہرین کا کہنا ہے کہ یہ رجحان پاکستان کی مستقبل کی ڈیجیٹل معیشت کیلئے نہایت خوش آئند ہے۔
