معروف یوٹیوبر سعد الرحمان عرف ڈکی بھائی کے یوٹیوب اکاؤنٹس اور ضبط کیے گئے سامان کی سپرداری سے متعلق کیس کا فیصلہ عدالت نے سنا دیا۔
ضلع کچہری لاہور میں دورانِ حراست ضبط کیے گئے اکاؤنٹس اور سامان کی سپرداری کے معاملے پر سماعت ہوئی، جس میں عدالت نے ڈکی بھائی کا یوٹیوب چینل اور موبائل فونز سپرداری پر دینے کی درخواست مسترد کر دی، تاہم جامع تلاشی کے دوران برآمد ہونے والی 19 اشیاء ڈکی بھائی کے حوالے کرنے کا حکم دے دیا۔
عدالت کے حکم کے مطابق واپس کی جانے والی اشیاء میں بینکنگ کارڈز، شناختی کارڈز، لیپ ٹاپ بیگ، گو پرو کیمرہ اور دیگر ذاتی سامان شامل ہے۔
فریقین اور وکلاء کے دلائل سننے کے بعد عدالت نے فیصلہ محفوظ کیا تھا، جسے جوڈیشل مجسٹریٹ نعیم وٹو نے بعد ازاں سنایا۔ سماعت کے دوران پراسیکیوٹر نے عدالت کو آگاہ کیا کہ یوٹیوبر سعد الرحمان اب تک آٹھ ویڈیوز اپلوڈ کر چکا ہے۔
