برطانوی اخبار دی ٹیلی گراف کی رپورٹ میں کہا گیا ہے کہ واشنگٹن میں بھارت کی شدید لابنگ کے باوجود اس بار پاکستان کو واضح سفارتی سبقت حاصل ہوئی ہے۔
رپورٹ کے مطابق ایبی گیٹ حملے کے ملزم شریف اللہ کی امریکا حوالگی ٹرمپ انتظامیہ کے ساتھ پاکستان کے قریبی تعلقات میں ایک اہم موڑ ثابت ہوئی، جس نے دونوں ممالک کے درمیان اعتماد کو مزید مضبوط کیا۔
اخبار کے مطابق امریکی کانگریس سے خطاب کے دوران صدر ٹرمپ نے دہشت گردی کے خلاف عملی تعاون پر پاکستان کا خصوصی طور پر شکریہ ادا کیا، جسے پاکستان کی سفارتی کوششوں کا اہم اعتراف قرار دیا جا رہا ہے۔
دی ٹیلی گراف نے لکھا ہے کہ بھارت کی بھرپور سفارتی مہم کے باوجود پاکستان نہ صرف نمایاں حیثیت حاصل کرنے میں کامیاب رہا بلکہ وزیراعظم پاکستان اور فیلڈ مارشل عاصم منیر کو اوول آفس تک براہ راست رسائی بھی ملی، جو غیر معمولی سفارتی کامیابی سمجھی جا رہی ہے۔
رپورٹ میں مزید کہا گیا ہے کہ پہلگام واقعے کے بعد خطے میں جنگ کا خطرہ حقیقی طور پر بڑھ گیا تھا، اس موقع پر بھارت نے امریکی ثالثی کے امکان کو کھلے الفاظ میں مسترد کر دیا، جبکہ پاکستان نے ذمہ دارانہ اور محتاط رویہ اپنایا۔
اخبار کے مطابق پاکستان نے وائٹ ہاؤس کے ساتھ غیر روایتی سفارتکاری کے ذریعے معاملات کو سنبھالا، جس کے نتیجے میں خطے میں کشیدگی کم کرنے اور عالمی سطح پر اپنا مثبت مؤقف اجاگر کرنے میں کامیابی حاصل کی۔
