بیجنگ، چین کی خبر ایجنسی شنہوا کے مطابق چین کے دوبارہ استعمال کے قابل راکٹ لانگ مارچ-12بی نے جمعے کی سہ پہر کامیاب اسٹیٹک فائرنگ ٹیسٹ مکمل کر لیا، جو اس کے آئندہ فلائٹ مشنز کی جانب ایک اہم پیش رفت قرار دی جا رہی ہے۔
راکٹ کے ڈویلپر کے مطابق یہ فائرنگ ٹیسٹ شمال مغربی چین میں واقع ڈونگ فینگ کمرشل اسپیس انوویشن پائلٹ زون میں انجام دیا گیا۔
لانگ مارچ-12بی کو چائنا ایرو اسپیس سائنس اینڈ ٹیکنالوجی کارپوریشن کے تحت کام کرنے والی ایک کمرشل راکٹ تیار کرنے والی کمپنی نے تیار کیا ہے، جو نئی نسل کا دوبارہ استعمال کے قابل راکٹ ہے اور کمرشل لو ارتھ آربٹ سیٹلائٹ کانسٹیلیشنز کی تعیناتی کے لیے ڈیزائن کیا گیا ہے۔
اس راکٹ میں قریبی زمینی مدار تک 20 ٹن تک کا پے لوڈ لے جانے کی صلاحیت موجود ہے۔ کمپنی کے مطابق اس ٹیسٹ نے راکٹ کے ڈیزائن کی افادیت اور قابلِ اعتماد ہونے کو مکمل طور پر ثابت کر دیا ہے، جو آئندہ فلائٹ ٹیسٹس کے لیے مضبوط بنیاد فراہم کرے گا۔
