سکیورٹی ذرائع کے مطابق پاکستان نے گزشتہ رات افغانستان میں انٹیلی جنس بنیادوں پر ہدفی ائیر اسٹرائیکس کیں، جن کے نتیجے میں فتنہ الخوارج اور کالعدم ٹی ٹی پی کے سات اہم مراکز تباہ کر دیے گئے۔
ذرائع کا کہنا ہے کہ کارروائیاں افغانستان کے تین صوبوں ننگرہار، پکتیکا اور خوست میں کی گئیں۔ ان حملوں میں دہشتگردوں کے ٹھکانوں کو مؤثر انداز میں نشانہ بنایا گیا۔
سکیورٹی ذرائع کے مطابق ابتدائی اطلاعات میں 80 سے زائد خوارج کے ہلاک ہونے کی تصدیق کی گئی ہے، جبکہ متعدد مراکز مکمل طور پر تباہ ہو گئے۔
تباہ کیے گئے مراکز میں نیا مرکز نمبر ایک اور نیا مرکز نمبر دو (ننگرہار)، خارجی مولوی عباس مرکز (خوست)، خارجی اسلام مرکز (ننگرہار)، خارجی ابراہیم مرکز (ننگرہار)، خارجی ملاراہبر مرکز (پکتیکا) اور خارجی مخلص یار مرکز (پکتیکا) شامل ہیں۔
سکیورٹی حکام کا کہنا ہے کہ یہ کارروائیاں مصدقہ خفیہ اطلاعات کی بنیاد پر کی گئیں اور ان کا مقصد پاکستان کے خلاف دہشتگرد کارروائیوں کی منصوبہ بندی کو ناکام بنانا تھا۔ مزید تفصیلات منظر عام پر آنے پر جاری کی جائیں گی۔
