ایران کے وزیر خارجہ عباس عراقچی نے آبنائے ہرمز کی کشیدہ صورتحال کا ذمہ دار امریکااور اسرائیل کو قرار دیتے ہوئے کہا ہے کہ ایران کسی بھی قسم کی دھمکیوں سے خوفزدہ نہیں ہوگا۔
اپنے بیان میں انہوں نے کہا کہ آبنائےہرمز میں جہازوں کی آمدورفت میں رکاوٹ دراصل اس جنگ کا نتیجہ ہے جس کا آغاز امریکا اور اسرائیل نے کیا، لہٰذا اس صورتحال کی ذمہ داری ایران پر نہیں بلکہ انہی ممالک پر عائد ہوتی ہے۔
عباس عراقچی کا کہنا تھا کہ ایران بحری راستوں کے معاملے پر دباؤ یا دھمکیوں کو قبول نہیں کرے گا، اور نہ ہی انشورنس کمپنیوں یا دیگر فریقین کو غیر ضروری دباؤ میں آنے دیا جائے گا۔
دوسری جانب ایرانی وزارت خارجہ نے بھی اپنے بیان میں مؤقف اختیار کیا ہے کہ آبنائے ہرمز میں بڑھتی ہوئی کشیدگی اور خطرناک صورتحال کے براہ راست ذمہ دار امریکا اور اسرائیل ہیں۔
یاد رہے کہ اس سے قبل امریکی صدر ڈونلڈ ٹرمپ نے ایران کو دھمکی دی تھی کہ اگر 48 گھنٹوں کے اندر آبنائے ہرمز کو نہ کھولا گیا تو سخت کارروائی کی جائے گی۔
