ایران پر اسرائیل اور امریکا کی جنگ کے نتیجے میں عالمی فضائی صنعت کو بھاری نقصان کا سامنا کرنا پڑا ہے، جہاں دنیا کی 20 بڑی ایئر لائنز کو مجموعی طور پر 53 ارب ڈالرز کے خسارے کا تخمینہ لگایا گیا ہے۔
غیر ملکی خبر ایجنسیوں کے مطابق اس جنگ نے خلیجی ممالک کے ہوائی اڈوں اور پروازوں کے شیڈول کو شدید متاثر کیا ہے، جس کے باعث فضائی آپریشنز میں خلل پیدا ہوا ہے۔
برطانوی میڈیا رپورٹس کے مطابق ایئرلائن انڈسٹری کورونا وبا کے بعد ایک بار پھر بدترین بحران کی زد میں آ گئی ہے، جبکہ جنگ کے باعث ایندھن کی ممکنہ قلت کا خدشہ بھی بڑھ گیا ہے۔
رپورٹس میں بتایا گیا ہے کہ جنگ شروع ہونے کے بعد جیٹ فیول کی قیمت دگنی ہو چکی ہے، جس کے نتیجے میں ایئر لائن ٹکٹوں کی قیمتوں میں نمایاں اضافے کا امکان ظاہر کیا جا رہا ہے۔
ماہرین کا کہنا ہے کہ اگر کشیدگی برقرار رہی تو عالمی فضائی صنعت کو مزید مالی نقصان اور مسافروں کو مہنگے سفر کا سامنا کرنا پڑ سکتا ہے۔
