اسلام آباد: وفاقی حکومت نے مالی دباؤ اور بڑھتے ہوئے اخراجات کے پیش نظر وفاقی ترقیاتی بجٹ میں 100 ارب روپے کی نمایاں کٹوتی کر دی ہے۔
وفاقی وزیر برائے منصوبہ بندی Ahsan Iqbal نے اس فیصلے کی تصدیق کرتے ہوئے بتایا کہ وزارت خزانہ کی جانب سے پبلک سیکٹر ڈویلپمنٹ پروگرام (پی ایس ڈی پی) میں یہ کمی کی گئی ہے۔
اس فیصلے کے تحت رواں مالی سال میں شامل تمام ترقیاتی منصوبوں کے بجٹ میں 10 فیصد کٹوتی نافذ کر دی گئی ہے، جس کے نتیجے میں وفاقی ترقیاتی بجٹ کا مجموعی حجم ایک ہزار ارب روپے سے کم ہو کر 900 ارب روپے رہ گیا ہے۔
دوسری جانب حکومت عالمی مارکیٹ میں قیمتوں میں اضافے کے باوجود پیٹرول اور ڈیزل کی قیمتیں نہ بڑھانے کی پالیسی پر عمل پیرا ہے، جس کے باعث اب تک تقریباً 72 ارب روپے کی سبسڈی برداشت کی جا چکی ہے۔
وزیر اعظم نے بھی اپنے حالیہ خطاب میں عوام پر پیٹرولیم مصنوعات کا بوجھ منتقل نہ کرنے کے عزم کا اظہار کرتے ہوئے واضح کیا تھا کہ اس مقصد کے لیے ترقیاتی بجٹ میں کمی کرنا پڑی۔
