گھٹنوں کے جوڑ ہڈیوں، بافتوں، ریشوں اور مسلز کے پیچیدہ نظام کی وجہ سے نسبتاً کمزور ہوتے ہیں، اور گھٹنوں میں تکلیف کئی مسائل کی وجہ سے پیدا ہو سکتی ہے، جیسے چوٹ، جوڑوں کے امراض یا گھٹنے کی بافتوں کے مسائل۔
گھٹنوں کی کمزوری کی وجہ سے عام حرکتیں جیسے سیدھا کھڑا ہونا یا چہل قدمی بھی مشکل اور تکلیف دہ بن جاتی ہیں، لیکن گھٹنوں کو مضبوط بنانے سے ان مسائل سے بچنا آسان ہو جاتا ہے اور اگر پہلے سے تکلیف ہو تو اس کی شدت کم ہو جاتی ہے۔
اس سلسلے میں ایک آسان اور مؤثر ورزش جو گھٹنوں کے لیے فائدہ مند ثابت ہوتی ہے وہ ہے سیڑھیاں چڑھنا۔ سیڑھیاں چڑھنے سے گھٹنوں کے اردگرد کے مسلز مضبوط ہوتے ہیں، جو جوڑوں پر دباؤ کو کم کرتے ہیں۔
رانوں تک پھیلے یہ مسلز بہتر قوت اور لچک حاصل کرتے ہیں، اور اس کے ساتھ جسمانی وزن کو کنٹرول کرنے میں بھی مدد ملتی ہے، جو گھٹنوں پر غیر ضروری دباؤ کو کم کرتا ہے۔
محض 5 منٹ روزانہ سیڑھیاں چڑھنے سے تقریباً 45 کیلوریز جلائی جا سکتی ہیں، اور ہفتے میں پانچ دن یہ ورزش کرنے سے ایک سال میں وزن کم کرنے کے ساتھ ساتھ جوڑوں پر اضافی دباؤ بھی نمایاں طور پر کم ہو جاتا ہے۔
تاہم، اگر گھٹنوں میں پہلے سے چوٹ یا جوڑوں کے امراض موجود ہیں، یا دل اور نظام تنفس کے مسائل ہیں، تو اس ورزش کو شروع کرنے سے پہلے ڈاکٹر سے مشورہ کرنا ضروری ہے تاکہ کسی بھی خطرے سے بچا جا سکے۔
درمیانی عمر کے افراد کو خاص احتیاط کی ضرورت ہوتی ہے، اور وزن کو کنٹرول میں رکھنے کے ساتھ ٹانگوں کو مضبوط بنانے والی دیگر ورزشیں بھی گھٹنوں کی صحت کے لیے مفید ہیں۔
