سعودی عرب پہنچنے پر گفتگو کرتے ہوئے برطانوی وزیراعظم کیئراسٹامر نے کہا ہے کہ امریکا اور ایران کے درمیان جنگ بندی ہو چکی ہے، تاہم ابھی بہت کام کرنا باقی ہے۔ انہوں نے زور دیا کہ اس جنگ بندی کو مستقل اور دیرپا امن میں تبدیل کرنے کے لیے مزید اقدامات ضروری ہیں۔
کیئر اسٹارمر کا کہنا تھا کہ ہم سب جس پائیدار امن کے خواہاں ہیں، اس کے حصول کے لیے سنجیدہ کوششیں جاری رکھنا ہوں گی۔ انہوں نے واضح کیا کہ یہ جنگ برطانیہ کی جنگ نہیں تھی بلکہ ان کی ذمہ داری اپنے ملک کا تحفظ یقینی بنانا ہے۔
برطانوی وزیراعظم نے مزید کہا کہ آبنائے ہرمز کا کھلا رہنا عالمی تجارت اور استحکام کے لیے انتہائی اہم ہے، اسی مقصد کے لیے متعدد ممالک کو یکجا کیا جا رہا ہے، جبکہ سعودی عرب اور خطے کے دیگر ممالک کے ساتھ بھی اس حوالے سے مشاورت کی جائے گی۔
