تہران: ایرانی خبر رساں ادارے فارس نیوز ایجنسی نے باخبر ذرائع کے حوالے سے دعویٰ کیا ہے کہ ایران نے آج اتوار کے روز امریکہ کے ساتھ کسی بھی ممکنہ معاہدے پر دستخط نہ کرنے کا فیصلہ کیا ہے، کیونکہ یہ تاریخ امریکی صدر ڈونلڈ ٹرمپ کی سالگرہ کے ساتھ مطابقت رکھتی ہے۔
رپورٹ کے مطابق ایرانی حکام کو خدشہ ہے کہ صدر ٹرمپ اس موقع کو میڈیا تشہیر اور سیاسی فائدے کے لیے استعمال کر سکتے ہیں۔ ذرائع کا کہنا ہے کہ تہران نہیں چاہتا کہ کسی ممکنہ معاہدے کو ٹرمپ کی ذاتی کامیابی یا سالگرہ کے تحفے کے طور پر پیش کیا جائے۔
فارس نیوز ایجنسی نے مزید بتایا کہ بعض مبصرین کے نزدیک معاہدے کی تاریخ پر اصرار کا مقصد اس پیش رفت کو صدر ٹرمپ کی سیاسی کامیابی کے طور پر اجاگر کرنا ہو سکتا ہے۔
واضح رہے کہ 14 جون امریکی صدر ڈونلڈ ٹرمپ کی سالگرہ ہے۔ وہ 1946 میں پیدا ہوئے تھے اور آج اپنی 80ویں سالگرہ منا رہے ہیں۔
