یورپی یونین کی خارجہ پالیسی کی سربراہ کاجا کالاس نے اعلان کیا کہ رکن ممالک کے وزرائے خارجہ نے مشترکہ طور پر پاسدارانِ انقلاب کو دہشت گرد تنظیموں کی فہرست میں شامل کرنے پر اتفاق کیا ہے۔
ادھر ایران کی مسلح افواج نے یورپی یونین کے فیصلے کو مسترد کرتے ہوئے اسے غیر منطقی، غیر ذمہ دارانہ اور بدنیتی پر مبنی اقدام قرار دیا۔ ایرانی بیان میں کہا گیا کہ یہ فیصلہ امریکا اور صہیونی حکومت کی بالادست اور غیر انسانی پالیسیوں کی اندھی تقلید کا نتیجہ ہے۔
یاد رہے کہ پاسدارانِ انقلاب 1979 کے ایرانی انقلاب کے بعد قائم کی گئی تھی اور یہ ایران کی مسلح افواج کا ایک اہم حصہ ہے۔ یہ فورس باقاعدہ فوج کے ساتھ مل کر کام کرتی ہے اور براہِ راست سپریم لیڈر آیت اللہ علی خامنہ ای کو جواب دہ ہے۔
پاسدارانِ انقلاب ایران کے دفاع، بیرونی آپریشنز اور خطے میں اثر و رسوخ میں مرکزی کردار ادا کرتی ہے۔ تقریباً ایک لاکھ 90 ہزار فعال اہلکاروں پر مشتمل اس فورس کے ریزرو سمیت مجموعی اہلکاروں کی تعداد 6 لاکھ سے زائد بتائی جاتی ہے۔
یہ ایران کے بیلسٹک میزائل اور جوہری پروگراموں کی نگرانی کے ساتھ مشرقِ وسطیٰ میں اتحادی گروہوں کی حمایت بھی کرتی ہے۔اس سے پہلے مریکا نے 2019 میں پاسدارانِ انقلاب کو غیر ملکی دہشت گرد تنظیم قرار دیا تھا۔
