غیر ملکی خبر رساں ایجنسی کے مطابق یورپی یونین کے وزرائے خارجہ نے پاسدارانِ انقلاب کو دہشت گرد تنظیموں کی فہرست میں شامل کرنے کی منظوری دے دی ہے۔
یورپی یونین کی خارجہ پالیسی کی سربراہ کاجا کالاس کا کہنا ہے کہ جبر کو جوابدہ کیے بغیر نہیں چھوڑا جا سکتا، اور جو حکومت اپنے ہزاروں شہریوں کو قتل کرتی ہے وہ اپنی تباہی کی طرف بڑھتی ہے۔
دوسری جانب ایرانی وزیر خارجہ عباس عراقچی نے فیصلے پر ردعمل دیتے ہوئے کہا کہ یورپ پاسدارانِ انقلاب کو دہشت گرد تنظیم قرار دے کر ایک بڑی اسٹریٹیجک غلطی کر رہا ہے۔
ایرانی فوج نے بھی اس اقدام کو غیر ذمہ دارانہ اور عناد پر مبنی قرار دیتے ہوئے کہا کہ یورپی یونین کا یہ غیر منطقی فیصلہ بلاشبہ امریکا اور اسرائیل کی غیر انسانی پالیسیوں کی اندھی تابعداری ہے۔
