تہران سے موصولہ اطلاعات کے مطابق ایران کے سپریم لیڈر مجتبیٰ خامنہ ای نے امریکا کے ساتھ کشیدگی کم کرنے کے لیے پیش کی جانے والی دو مختلف تجاویز کو مسترد کر دیا ہے۔
ایک سینئر ایرانی عہدیدار کے مطابق یہ تجاویز ایک اہم خارجہ پالیسی اجلاس کے دوران زیرِ غور آئیں، جنہیں دو ثالثی ممالک کی جانب سے پیش کیا گیا تھا، تاہم سپریم لیڈر نے انہیں قابلِ قبول نہیں سمجھا۔
ذرائع کے مطابق اجلاس کے دوران مجتبیٰ خامنہ ای نے دوٹوک مؤقف اختیار کرتے ہوئے کہا کہ موجودہ حالات میں امن کی بات نہیں کی جا سکتی اور ایران کو امریکا اور اسرائیل کے خلاف اپنی پوزیشن مضبوط رکھنی ہوگی۔
انہوں نے مزید کہا کہ امریکا کو ایران کو پہنچنے والے نقصانات کا مکمل ہرجانہ ادا کرنا ہوگا، جس سے دونوں ممالک کے درمیان بڑھتی ہوئی کشیدگی مزید واضح ہو گئی ہے۔
دوسری جانب اسرائیل کی جانب سے بھی صورتحال کو مزید سنگین بنانے والے بیانات سامنے آئے ہیں۔ اسرائیلی وزیر دفاع اسرائیل کٹز نے دعویٰ کیا ہے کہ حالیہ اسرائیلی حملوں کے دوران ایران کے سکیورٹی چیف علی لاریجانی کو نشانہ بنا کر ہلاک کر دیا گیا ہے۔ ان کے مطابق یہ کارروائی گزشتہ رات کیے گئے حملوں کے دوران انجام دی گئی۔
علاقائی ماہرین کے مطابق ایران اور اسرائیل کے درمیان بڑھتی ہوئی کشیدگی نہ صرف مشرقِ وسطیٰ بلکہ عالمی امن کے لیے بھی ایک بڑا خطرہ بن سکتی ہے، جبکہ سفارتی سطح پر کشیدگی کم کرنے کی کوششیں بھی تاحال کامیاب ہوتی نظر نہیں آ رہیں۔
