قطر اور جنوبی کوریا کے بینکوں کے درمیان ایران کے تقریباً 7 ارب ڈالر مالیت کے منجمد اثاثوں کی رہائی کے لیے اہم پیش رفت سامنے آئی ہے۔
ذرائع کے مطابق یہ فنڈز کئی سالوں سے جنوبی کوریا کے بینکوں میں امریکی پابندیوں کے باعث منجمد تھے، جو ایران نے ماضی میں تیل کی فروخت سے حاصل کیے تھے۔
رپورٹس کے مطابق ان فنڈز کو براہِ راست ایران منتقل کرنے کے بجائے پہلے قطر کے بینکوں میں منتقل کرنے کی تجویز زیرِ غور ہے، تاکہ ان کے استعمال کو مخصوص مقاصدجیسے انسانی ہمدردی کی اشیاء (خوراک، ادویات وغیرہ)تک محدود رکھا جا سکے۔
ماضی میں بھی اسی نوعیت کے معاہدے کے تحت تقریباً 6 ارب ڈالر قطر منتقل کیے گئے تھے، تاہم ایران کو ان تک مکمل رسائی حاصل نہیں ہو سکی۔
ایرانی حکام نے واضح کیا ہے کہ وہ امریکہ کے ساتھ کسی بھی نئے مذاکرات سے قبل ان فنڈز کی مکمل اور مؤثر رہائی چاہتے ہیں۔ ایران کا مؤقف ہے کہ یہ اس کا اپنا سرمایہ ہے، جسے بلاجواز پابندیوں کی وجہ سے روکا گیا، اور مذاکرات سے پہلے اس مسئلے کا حل ضروری ہے۔
ماہرین کے مطابق یہ معاملہ نہ صرف ایران اور امریکہ کے درمیان تعلقات پر اثر انداز ہو سکتا ہے بلکہ مشرقِ وسطیٰ کی مجموعی سیاسی و معاشی صورتحال پر بھی گہرے اثرات ڈال سکتا ہے۔
اگر فنڈز کی رہائی ممکن ہو جاتی ہے تو یہ ممکنہ طور پر ایران اور مغربی ممالک کے درمیان کشیدگی میں کمی اور نئے سفارتی دروازے کھولنے کا سبب بن سکتی ہے۔
