پیٹرول اور ڈیزل کی حالیہ قیمتوں میں نمایاں کمی کے بعد ان پر عائد ٹیکسوں کی تفصیلات بھی سامنے آ گئی ہیں، جن کے مطابق دونوں مصنوعات کی موجودہ قیمت کا تقریباً 29 فیصد حصہ مختلف ٹیکسوں اور لیویز پر مشتمل ہے۔
ذرائع پیٹرولیم ڈویژن کے مطابق ایک لیٹر پیٹرول کی موجودہ قیمت 299 روپے 50 پیسے میں مجموعی طور پر 88 روپے 7 پیسے ٹیکسز شامل ہیں۔ ان ٹیکسوں میں 19 روپے 32 پیسے کسٹم ڈیوٹی، 66 روپے 25 پیسے پیٹرولیم لیوی اور 2 روپے 50 پیسے کلائمیٹ سپورٹ لیوی شامل ہے۔
اسی طرح ایک لیٹر ڈیزل کی قیمت 311 روپے 47 پیسے میں مجموعی طور پر 91 روپے 15 پیسے ٹیکسوں کی مد میں وصول کیے جا رہے ہیں۔ ذرائع کے مطابق ڈیزل پر 15 روپے 68 پیسے کسٹم ڈیوٹی، 72 روپے 97 پیسے پیٹرولیم لیوی اور 2 روپے 50 پیسے کلائمیٹ سپورٹ لیوی عائد ہے۔
پیٹرولیم ڈویژن کے ذرائع کا کہنا ہے کہ پیٹرول اور ڈیزل دونوں کی قیمتوں میں ٹیکسوں کا تناسب تقریباً 29 فیصد بنتا ہے، جبکہ باقی رقم درآمدی لاگت، ریفائننگ، ترسیل اور دیگر اخراجات پر مشتمل ہے۔
واضح رہے کہ حکومت نے گزشتہ روز پیٹرول کی قیمت میں 74 روپے 28 پیسے اور ہائی اسپیڈ ڈیزل کی قیمت میں 67 روپے 31 پیسے فی لیٹر کمی کا اعلان کیا تھا۔ اس کمی کے بعد پیٹرول کی نئی قیمت 299 روپے 50 پیسے فی لیٹر جبکہ ڈیزل کی نئی قیمت 311 روپے 47 پیسے فی لیٹر مقرر کی گئی ہے۔
معاشی ماہرین کے مطابق قیمتوں میں حالیہ کمی سے عوام کو وقتی ریلیف ضرور ملے گا، تاہم پیٹرولیم مصنوعات پر عائد بلند لیویز اور ٹیکس اب بھی صارفین کے لیے ایک اہم مالی بوجھ ہیں۔
