وزیر اعظم کے مشیر برائے سیاسی امور رانا ثنا اللہ نے فیصل آباد میں نماز عید کے موقع پر میڈیا سے گفتگو کرتے ہوئے کہا کہ پاکستان تحریک انصاف (پی ٹی آئی) کے لیے بہتر ہوگا کہ وہ احتجاجی تحریک شروع نہ کرے کیونکہ اس سے انہیں کوئی فائدہ نہیں ہوگا بلکہ اپنے کارکنوں کے لیے مشکلات بڑھائیں گے۔ انہوں نے کہا کہ پی ٹی آئی فی الحال کوئی تحریک چلانے کی پوزیشن میں نہیں ہے اور انہیں ذاتی سیاست کے بجائے قومی مسائل پر توجہ دینی چاہیے۔
رانا ثنا اللہ نے اپوزیشن پر زور دیا کہ وہ ہمارے ساتھ بیٹھ کر الیکشن قوانین میں ترامیم کریں اور عوام کے مسائل کے حل کے لیے بات چیت کریں۔ انہوں نے کہا کہ پاکستان معاشی استحکام اور ترقی کی راہ پر ہے، لیکن اسے سیاسی اتفاق اور معاشی ایجنڈے پر ہم آہنگی کی ضرورت ہے۔
انہوں نے اپوزیشن سے کہا کہ پہلے میثاق معیشت کریں، پھر دیگر سیاسی مسائل پر بات ہو سکتی ہے۔ رانا ثنا اللہ نے وزیراعظم شہباز شریف کی جانب سے غیر جانبدار الیکشن کمیشن کی تشکیل کی دعوت کو قبول کرنے کی اپیل بھی کی تاکہ انتخابات شفاف ہوں۔
ایک سوال کے جواب میں انہوں نے کہا کہ بھارت نے پاکستان کو کمزور سمجھ کر حملہ کیا، لیکن پاکستانی مسلح افواج نے بھرپور جواب دیا اور دشمن کا غرور خاک میں ملا دیا۔ رانا ثنا اللہ نے فوجی قیادت، خاص طور پر فیلڈ مارشل عاصم منیر اور دیگر اہلکاروں کو مبارکباد دی اور کہا کہ آج پاکستان دنیا میں ایک طاقتور اور ذمہ دار ملک کے طور پر جانا جاتا ہے۔
