خطرہ ابھی ختم نہیں ہوا، ایران دفاع کے لیے مکمل تیار ہے، آرمی چیف

ایران کی نیم سرکاری خبررساں ایجنسی مہرنیوز کے مطابق، ایرانی آرمی کے کمانڈر انچیف میجر جنرل امیر حاتمی نے کہا ہے کہ ایران کو لاحق دشمن کے خطرات ابھی مکمل طور پر ختم نہیں ہوئے، اور مسلح افواج ملکی دفاع کے لیے مکمل طور پر تیار ہیں۔انہوں نے فوج کے زمینی دستوں کے اعلیٰ افسران سے خطاب کرتے ہوئے کہا کہ صہیونی حکومت نے ایران کے خلاف ایک بڑی اسٹریٹجک غلطی کی، جو ایرانی عوام کی استقامت اور مزاحمت کے باعث ناکامی کا شکار ہوئی۔ جنرل حاتمی نے زور دے کر کہا کہ صہیونی حکومت کے مظالم کئی مواقع پر نمایاں ہوئے، جن میں 12 روزہ جنگ بھی شامل ہے۔انہوں نے مزید کہا کہ غزہ میں گزشتہ دو برسوں کے دوران اور اسرائیل کی جانب سے 80 سال سے کم عرصے میں مختلف ممالک کے خلاف کی گئی جارحیتیں اس کی دشمنی کا کھلا ثبوت ہیں۔ جنرل حاتمی نے اعتراف کیا کہ ایران کو اپنے کئی اہم کمانڈروں، سائنس دانوں اور معزز شہریوں کی قربانی دینا پڑی، مگر اس غیر منصفانہ جنگ میں ایران کامیاب رہا اور دشمن کے منصوبے ناکام بنا دیے گئے۔انہوں نے بتایا کہ ایران کے میزائل اور ڈرون نظام پوری طرح فعال اور مؤثر ہیں، اور جوابی کارروائیاں جنگ بندی کے آخری لمحے تک جاری رہیں گی۔ ان کا کہنا تھا کہ ایران دفاعی صنعت، سائنسی ترقی اور ٹیکنالوجی میں پہلے سے زیادہ عزم و حوصلے کے ساتھ اپنی پیش رفت جاری رکھے گا۔میجر جنرل حاتمی نے عالمی استکباری قوتوں کی ایران سے دشمنی کی وجہ اسلامی جمہوریہ کی دینی شناخت، حب الوطنی اور سائنسی ترقی کو قرار دیا اور کہا کہ ایرانی افواج سائنسی و تکنیکی میدان میں تیزی سے ترقی کرتے ہوئے ہمہ جہت دفاع کے لیے مزید مضبوط تیاریوں میں مصروف ہیں۔