وزیراعظم کی ہدایت پر افغانستان کے زلزلہ متاثرین کے لیے 105 ٹن امدادی سامان روانہ

اسلام آباد: وزیراعظم پاکستان کی ہدایت پر این ڈی ایم اے کی جانب سے افغانستان میں آنے والے حالیہ تباہ کن زلزلے کے متاثرین کے لیے 105 ٹن امدادی سامان روانہ کردیا گیا۔ترجمان این ڈی ایم اے کے مطابق، امدادی سامان میں راشن بیگز، خیمے، کمبل، چٹائیاں اور ادویات شامل ہیں۔ یہ سامان 40 فٹ کنٹینر والے 5 ٹرکوں کے ذریعے طورخم بارڈر کے راستے افغانستان بھیجا جا رہا ہے۔امدادی سامان کی روانگی کی تقریب 3 ستمبر کو اسلام آباد میں این ڈی ایم اے کے وئیر ہاؤس پر منعقد ہوئی۔ تقریب میں مہمانِ خصوصی وفاقی وزیر کھیل داس کوہستانی سمیت این ڈی ایم اے اور وزارتِ خارجہ کے اعلیٰ حکام نے شرکت کی۔این ڈی ایم اے کے مطابق، پاکستان مشکل وقت میں افغان بھائیوں کے ساتھ کھڑا ہے اور متاثرین کی بحالی تک تعاون جاری رکھا جائے گا۔