ملک بھر میں آج جشن عید میلادالنبیﷺ مذہبی جوش و جذبے سے منایا جا رہا ہے

ملک بھر میں نبی پاک حضرت محمد مصطفیٰ ﷺ کا یومِ ولادت مذہبی عقیدت و احترام کے ساتھ منایا جا رہا ہے۔ مختلف شہروں کی گلیوں، محلوں اور بازاروں کو برقی قمقموں، روشنیوں اور سبز جھنڈیوں سے خوبصورتی سے سجایا گیا ہے، جبکہ سرکاری اور نجی عمارتوں پر چراغاں بھی کیا گیا ہے۔ کئی شاہراہوں اور بازاروں پر محرابیں اور آرائشی دروازے نصب کیے گئے ہیں، اور مساجد کو بھی برقی قمقموں سے مزین کیا گیا ہے۔ اس کے علاوہ درود و سلام اور نعت خوانی کی محافل کا اہتمام جاری ہے، اور فضا درود و سلام سے معطر ہے۔جشن کی مناسبت سے مختلف علاقوں میں نیاز تقسیم کرنے کے انتظامات کیے گئے ہیں، جبکہ پولیس اور دیگر قانون نافذ کرنے والے اداروں نے 12 ربیع الاول کے موقع پر فول پروف سیکیورٹی کے اقدامات کیے ہیں۔وفاقی اور صوبائی حکومتوں نے اس موقع پر عام تعطیل کا اعلان کیا ہے۔