امریکی فوج کا بلیک ہاک ہیلی کاپٹر واشنگٹن میں گر کر تباہ

واشنگٹن: امریکی فوج کا ایک بلیک ہاک ہیلی کاپٹر واشنگٹن کے علاقے سمٹ لیک میں گر کر تباہ ہوگیا۔ حادثے میں 160ویں اسپیشل آپریشنز ایوی ایشن رجمنٹ سے تعلق رکھنے والے 4 فوجی سوار تھے جن کی حالت تاحال نامعلوم بتائی جا رہی ہے۔تھرسٹن کاؤنٹی شیرف آفس کے مطابق حادثہ رات تقریباً 9 بجے پیش آیا، جس کے بعد جائے حادثہ پر آگ بھڑک اٹھی اور تقریباً ایک ایکڑ رقبہ جل کر خاکستر ہوگیا۔ حکام کے مطابق ایئر ٹریفک کنٹرول سے رابطہ منقطع ہونے کے بعد ہیلی کاپٹر حادثے کا شکار ہوا۔امریکی فوجی حکام نے بتایا کہ ہیلی کاپٹر معمول کی تربیتی پرواز پر تھا۔ شدید آگ اور حرارت کے باعث ریسکیو ٹیموں کو مشکلات کا سامنا ہے، تاہم اسپیشل آپریشنز یونٹس جائے حادثہ پر پہنچ رہی ہیں۔شیرف ڈیریک سانڈرز کے مطابق حادثے کا مقام جوائنٹ بیس لیوس مک کارڈ سے تقریباً 15 میل دور ہے۔ بیس کی ویب سائٹ کے مطابق یہاں 40 ہزار حاضر سروس فوجی اور ان کے اہل خانہ موجود ہیں۔ امریکی جریدے ملٹری ٹائمز کے مطابق حادثے کے وقت موسم صاف تھا اور 10 میل تک کا منظر واضح دکھائی دے رہا تھا۔