ایران کی نیم سرکاری مہر خبررساں ایجنسی کے مطابق، ایرانی مسلح افواج کے جنرل اسٹاف کے نائب سربراہ بریگیڈیئر جنرل احمد وحیدی نے کہا ہے کہ دشمنوں میں اتنی جرأت نہیں کہ وہ ایرانی سرزمین کی طرف میلی نظر ڈال سکیں۔
بندرعباس میں بحری زون کے دورے کے دوران انہوں نے کہا کہ ایران کی آبی سرحدوں پر آج جو مکمل امن قائم ہے، وہ سپاہ پاسداران انقلاب کے بحری جوانوں کی شب و روز قربانیوں اور انتھک کوششوں کا نتیجہ ہے۔
جنرل وحیدی کا کہنا تھا کہ دشمن ایرانی جوانوں کے عزم و حوصلے سے خوفزدہ ہیں اور اس سرزمین کی جانب بری نظر ڈالنے کی ہمت نہیں رکھتے۔
انہوں نے مزید کہا کہ ایرانی بحریہ نہ صرف سرحدوں کی حفاظت کر رہی ہے بلکہ دشمنوں کے مذموم عزائم کو بھی ناکام بنا رہی ہے، یہی وجہ ہے کہ دشمن ایران کی دفاعی اور ایمانی قوت کے سامنے بے بس ہوچکے ہیں۔
