پاراچنار میں قبائل کے مابین جھڑپیں چوتھے روز بھی جاری12جاں بحق، 60سے زائد زخمی

ضلع کرم میں دو قبائل کے درمیان زمین کے تنازع پر گز شتہ 4 دنوں سے جاری جھڑپیں جاری ہیں۔ مسلح قبائل ایک دوسرے کے خلاف بھاری ہتھیاروں کا استعمال کر رہے ہیں۔ جس کے نتیجے میں 12 افراد جاں بحق اور 60 سے زائد زخمی ہوگئے ہیں۔علاقے سے ملنے والی خبروں کے مطابق فریقین نے پاراچنار اور صدہ ٹاؤن سے ایک دوسرے پر راکٹ اور میزائل داغے۔گزشتہ تین دنوں کے دوران ہنگو اور اورکزئی اضلاع کے قبائلی جرگہ تمام تر کوشش کےباوجوددونوں قبائل کے درمیان جنگ بندی کروانے میں ناکام رہا ہے۔پولیس اور ضلعی انتظامیہ کے مطابق بوشہرہ اور مالی خیل قبائل کے درمیان زمین کے تنازع پر یہ جھڑپیں گزشتہ 3 دنوں سے جاری ہیں،حکام کے مطابق فائرنگ کا سلسلہ پیواڑ، تاری منگل، بالشخیل اور کنج علی زئی کے علاقوں تک پھیل چکا ہے تاہم وفاقی اور صوبائی حکومتوں کی جانب سے تاحال خاموشی اختیار کی گئی ہے،علاقے میں مسلسل فائرنگ کی وجہ سے سڑکوں پر ٹریفک کی روانی بھی متاثرہے۔