بولان:دہشت گردوں کے خلاف سکیورٹی فورسزکا آپریشن جاری،155مسافر بازیاب،27 دہشتگرد ہلاک

کوئٹہ سے پشاور جانے والی جعفر ایکسپریس پر دہشت گردوں نے حملہ کر کے مسافروں کو یرغمال بنالیا جس کے بعد سکیورٹی فورسز کی جانب سے علاقے میں کلیئرنس آپریشن جاری ہے اب تک 155 یرغمالی مسافروں کو بازیاب کر والیا گیاہے۔سکیورٹی ذرائع کے مطابق بازیاب کروائے جانے والوں میں مرد، خواتین اور بچے شامل ہیں،17 زخمیوں کو اسپتال منتقل کیا جا چکا ہے۔ باقی مسافروں کی باحفاظت بازیابی کے لیے سکیورٹی فورسز کوشاں ہیں۔سکیورٹی فورسز کی نگرانی میں مال ٹرین مسافروں کو لے کر مچھ ریلوے اسٹیشن پہنچ گئی ہے۔ریلوے حکام کا کہنا ہے کہ جعفرایکسپریس کے بازیاب 57 مسافروں کو کوئٹہ پہنچا دیا گیا،23 مسافرمچھ رک گئے۔سیکیورٹی ذرائع کے مطابق جعفر ایکسپریس پر بزدلانہ حملے کے دہشت گرد، افغانستان میں اپنے سہولت کاروں سے رابطے میں ہیں۔دہشت گردوں نے خود کش بمبار دہشت گردوں کو کچھ معصوم یرغمالی مسافروں کے بالکل پاس بیٹھایا ہوا ہے،خود کش بمبار خود کش جیکٹیں پہنے ھوئے ہیں، سیکیورٹی ذرائع کے مطابق ممکنہ شکست کے پیش نظر دہشت گرد خود کش بمبار معصوم لوگوں کو ڈھال کے طور پر استعمال کر رہے ہیں،فورسزباقی ماندا دہشت گردوں کے خاتمے کے لئےآپریشن جاری رکھے ہوئے ہیں