امریکا نے مشرقِ وسطیٰ کے اپنے اتحادی ممالک کو اربوں ڈالر مالیت کا اسلحہ اور فوجی ساز و سامان فروخت کرنے کی منظوری دے دی ہے۔ امریکی حکام کے مطابق اس مجوزہ دفاعی پیکیج کی مجموعی مالیت تقریباً 8 ارب 60 کروڑ ڈالر ہے۔
امریکی محکمہ خارجہ نے کویت کو ڈھائی ارب ڈالر مالیت کا بیٹل کمانڈ سسٹم اور اس سے متعلقہ دفاعی آلات فروخت کرنے کی اجازت دی ہے۔
اسی طرح اسرائیل کے لیے 99 کروڑ 24 لاکھ ڈالر مالیت کے ایڈوانسڈ پریسیژن کِل ویپن سسٹم کی فروخت کی منظوری بھی دی گئی ہے۔
امریکی حکام کے مطابق قطر کو 4 ارب ایک کروڑ ڈالر کے پیٹریاٹ میزائل فراہم کیے جائیں گے، جبکہ متحدہ عرب امادات کو 14 کروڑ 76 لاکھ ڈالر مالیت کے ایڈوانسڈ پریسیژن کِل ویپن سسٹمز فروخت کرنے کی منظوری دی گئی ہے۔
تجزیہ کاروں کا کہنا ہے کہ مشرقِ وسطیٰ میں بڑھتی ہوئی علاقائی کشیدگی اور سکیورٹی خدشات کے تناظر میں امریکا اپنے اتحادی ممالک کی دفاعی صلاحیتوں کو مزید مضبوط بنانے کی کوشش کر رہا ہے۔
