ٹرمپ کا بڑا فیصلہ، 12 ممالک پر مکمل،6ممالک پر جزوی سفری پابندیاں عائد

امریکی صدر ڈونلڈ ٹرمپ نے ایک نیا صدارتی حکم نامہ جاری کرتے ہوئے 12 ممالک پر مکمل سفری پابندیاں عائد کر دی ہیں، جبکہ 6 ممالک کو جزوی طور پر ان پابندیوں کا سامنا کرنا پڑے گا۔بین الاقوامی خبر رساں اداروں کے مطابق ابتدائی مرحلے میں پاکستان کو ان پابندیوں سے مستثنیٰ رکھا گیا ہے، جسے سفارتی تجزیہ کار واشنگٹن اور اسلام آباد کے درمیان حالیہ مثبت روابط کا اشارہ قرار دے رہے ہیں۔صدارتی فرمان کے مطابق، یہ نئی سفری پابندیاں پیر، 9 جون سے نافذ العمل ہوں گی، جس کے بعد ان پابندیوں کی زد میں آنے والے ممالک کے شہری یا تو امریکہ میں داخل نہیں ہو سکیں گے یا انہیں سخت سیکیورٹی مراحل سے گزرنا ہوگا۔نئے حکم نامے کے تحت جن 12 ممالک پر مکمل سفری پابندی لگائی گئی ہے ان میں افغانستان، ایران، یمن، لیبیا، صومالیہ، سوڈان، کانگو، برما، چاڈ، ایریٹریا، استوائی گنی اور ہیٹی شامل ہیں۔ ان ممالک کے شہریوں کو امریکی ویزا یا امیگریشن کی کسی بھی سہولت سے مکمل طور پر محروم کر دیا گیا ہے۔اس کے علاوہ، مزید 6 ممالک — برونڈی، کیوبا، لاؤس، سیرالیون، ترکمانستان، اور وینزویلا — کو جزوی سفری پابندی کی فہرست میں شامل کیا گیا ہے۔ ان ممالک کے شہریوں کو امریکہ میں داخلے سے قبل سخت سیکیورٹی جانچ، اضافی دستاویزی تصدیق اور محدود ویزا شرائط کا سامنا ہوگا۔
ابتدائی رپورٹس کے مطابق پاکستان ان فہرستوں میں شامل نہیں ہے، جسے وقتی طور پر ایک سفارتی کامیابی تصور کیا جا رہا ہے۔ تاہم، امریکی محکمہ خارجہ اور ہوم لینڈ سیکیورٹی کو یہ ہدایت دی گئی ہے کہ وہ امریکہ مخالف ممالک کی نئی فہرستیں تیار کریں، جس کے نتیجے میں مستقبل میں نئی پابندیوں کے امکانات کو رد نہیں کیا جا سکتا۔صدر ٹرمپ کا کہنا ہے کہ یہ اقدامات امریکی عوام کی سلامتی، قومی مفاد اور داخلی تحفظ کو یقینی بنانے کے لیے کیے جا رہے ہیں۔ انہوں نے مزید کہا کہ امریکہ ایسے افراد کو اپنے ملک میں داخل ہونے کی اجازت نہیں دے گا جو سیکیورٹی کے لیے ممکنہ خطرہ بن سکتے ہیں۔