اسلام آباد کے تھانہ کھنہ کے علاقے برما ٹاؤن میں سسرالیوں کے مبینہ تشدد سے سات ماہ کی حاملہ خاتون جاں بحق ہوگئیں۔ پولیس نے واقعے کا مقدمہ درج کر کے تحقیقات شروع کر دی ہیں۔پولیس کے مطابق مقتولہ تین بچوں کی ماں تھیں۔ ان کے بھائی کی مدعیت میں درج ایف آئی آر میں بتایا گیا ہے کہ مہوش کی شادی 2017 میں فیضان اقبال سے ہوئی تھی اور انہیں شوہر اور ساس کی جانب سے تشدد کا سامنا رہتا تھا۔ ایف آئی آر میں یہ بھی کہا گیا کہ سسرالیوں نے ماضی میں بھی مہوش کو بچوں سے محروم کر کے گھر سے نکال دیا تھا۔ بچوں کی عمریں سات سال، پانچ سال اور ڈیڑھ سال بتائی گئی ہیں۔مدعی کے مطابق وقوعے کے دن اطلاع دی گئی کہ مہوش کو کرنٹ لگا ہے اور اسپتال لے جایا جا رہا ہے، تاہم کچھ دیر بعد بتایا گیا کہ وہ جاں بحق ہو گئی ہیں۔ بعد ازاں ان کی میت آبائی علاقے مانسہرہ منتقل کر دی گئی، جہاں پوسٹمارٹم رپورٹ میں تشدد کے شواہد ملے۔ مدعی نے شوہر اور ساس پر قتل کا مقدمہ درج کرنے کا مطالبہ کیا ہے۔ پولیس نے کیس درج کر کے مزید تحقیقات شروع کر دی ہیں۔
اسلام آباد میں سسرالیوں کی مبینہ تشدد،سات ماہ کی حاملہ خاتون جاں بحق
Date:
