پاکستان میں کئی برسوں بعد پہلی بڑی اسٹریٹیجک نجکاری کا عمل مکمل کرلیا گیا۔متحدہ عرب امارات کی انٹرنیشنل ہولڈنگ کمپنی نے حکومت پاکستان کے شیئرز خرید لیے۔
نجکاری معاہدے کی مالیت 5 ارب روپے بتائی گئی ہے، جس کے تحت کمپنی کو 100 فیصد اسٹیک منتقل کیا جائے گا۔
مشیر وزیرِ خزانہ کے مطابق، یہ معاہدہ پاکستان کی معیشت پر عالمی سرمایہ کاروں کے اعتماد کی بحالی کی علامت ہے۔
انٹرنیشنل ہولڈنگ کمپنی مشرقِ وسطیٰ کی سب سے بڑی لسٹڈ کمپنی ہے، جس کی کل مالیت 240 ارب ڈالر سے زائد ہے۔ کمپنی کے 1300 سے زیادہ ذیلی ادارے مالیات، توانائی، اور ٹیکنالوجی سمیت مختلف شعبوں میں سرگرم ہیں۔
مشیر وزیرِ خزانہ نے کہا کہ آئی ایچ سی کی شمولیت سے پاکستان کے مالیاتی نظام میں ڈیجیٹلائزیشن، خودکاری، اور جدید گورننس کے ذریعے انقلاب متوقع ہے۔
ذرائع کے مطابق، آئی ایچ سی کے اربوں ڈالر کے نئے سرمایہ کاری منصوبے بھی پاکستان میں زیرِ غور ہیں، جب کہ کمپنی کی ذیلی شاخ آئی آر ایچ پہلے ہی مائننگ اور انرجی سیکٹر میں فعال ہے۔
مشیر نے مزید کہا کہ سعودی عرب، متحدہ عرب امارات، چین اور امریکہ کے سرمایہ کاروں کی پاکستان میں دلچسپی مسلسل بڑھ رہی ہے، جو ملکی معیشت کے لیے خوش آئند پیش رفت ہے۔
