پنجاب بھر میں دفعہ 144 کے نفاذ میں سات روز کی توسیع کر دی گئی ہے، جس کے دوران ہر قسم کے احتجاج، جلسے، جلوس، ریلیوں، دھرنوں اور اجتماعات پر پابندی برقرار رہے گی۔
ترجمان محکمہ داخلہ پنجاب کے مطابق دفعہ 144 کے تحت عوامی مقامات پر چار یا زائد افراد کے جمع ہونے پر مکمل پابندی ہوگی، جبکہ اسلحے کی نمائش اور لاؤڈ اسپیکر کے استعمال کی بھی اجازت نہیں ہوگی۔
ترجمان نے بتایا کہ اشتعال انگیز، نفرت آمیز یا فرقہ وارانہ مواد کی اشاعت اور تقسیم پر بھی سخت پابندی عائد ہے۔ یہ فیصلہ امن و امان کے قیام اور انسانی جانوں و املاک کے تحفظ کے پیشِ نظر کیا گیا ہے۔
تاہم ترجمان کے مطابق یہ پابندی شادی کی تقریبات، جنازوں اور تدفین پر لاگو نہیں ہوگی، جب کہ سرکاری فرائض انجام دینے والے افسران، اہلکار اور عدالتیں اس پابندی سے مستثنیٰ ہیں۔
مزید کہا گیا ہے کہ لاؤڈ اسپیکر صرف اذان اور جمعے کے خطبے کے لیے استعمال کیا جا سکے گا۔ محکمہ داخلہ پنجاب نے ہفتہ 8 نومبر تک دفعہ 144 کے نفاذ میں توسیع کا باقاعدہ نوٹیفکیشن بھی جاری کر دیا ہے۔
