اسلام آباد میں وزیرِاعظم کے مشیر برائے نجکاری محمد علی کی زیرِ صدارت نجکاری کمیشن بورڈ کے اجلاس میں تین بین الاقوامی ہوائی اڈوں کو موجودہ نجکاری پروگرام میں شامل کرنے کی سفارش کی گئی۔
اجلاس کے بعد میڈیا کو جاری اعلامیہ میں بتایا گیا کہ اسلام آباد، لاہور اور کراچی کے ہوائی اڈوں سے متعلق سفارشات کابینہ کی نجکاری کمیٹی کو بھیج دی گئی ہیں۔
اعلامیہ کے مطابق ان ہوائی اڈوں کا انتظام طویل المدتی رعایتی بنیادوں پر نجی شعبے کے حوالے کرنے کی تجویز دی گئی ہے تاکہ انتظامی امور میں بہتری اور سرمایہ کاری میں اضافہ ممکن بنایا جا سکے۔
اجلاس میں ہاؤس بلڈنگ فنانس کمپنی لمیٹڈ، قومی ایئر لائن اور تین بین الاقوامی ہوائی اڈوں کی نجکاری سے متعلق اہم فیصلے بھی کیے گئے۔
ہاؤس بلڈنگ فنانس کمپنی لمیٹڈ کی نجکاری کے لیے ریفرنس پرائس اور سیل پرچیز ایگریمنٹ کو حتمی شکل دے دی گئی ہے، جبکہ بولی کا عمل ریفرنس پرائس کی منظوری اور کابینہ کی توثیق کے بعد شروع کیا جائے گا۔
