سابق وزیر اعظم نواز شریف کے قریبی ساتھی اور پاکستان مسلم لیگ ن کے سینئر رہنما سینیٹر عرفان صدیقی انتقال کر گئے۔
ذرائع کے مطابق وہ گزشتہ دو ہفتوں سے اسلام آباد کے ایک نجی اسپتال میں زیر علاج تھے۔پیر کے روز ان کے وینٹی لیٹر پر منتقل ہونے کی خبریں سامنے آئیں، تاہم ان کے اہلِ خانہ نے اس کی تردید کی تھی۔ رات گئے ان کے انتقال کی تصدیق ہو گئی۔
عرفان صدیقی طویل عرصے تک نواز شریف کے قریبی مشیر اور بااعتماد ساتھی رہے۔انہوں نے 1997 میں مسلم لیگ ن سے وابستگی اختیار کی، جب وہ اس وقت کے صدر رفیق تارڑ کے تقریر نویس کے طور پر خدمات انجام دے رہے تھے۔
اس سے قبل وہ مختلف اخبارات میں کالم نگاری کے ساتھ ساتھ سرسید کالج میں بطور لیکچرر تعلیمی خدمات بھی سرانجام دیتے رہے۔ بعد ازاں وہ نواز شریف کی تقاریر لکھنے کے فرائض بھی انجام دیتے رہے۔
عرفان صدیقی کو مسلم لیگ ن کے ٹکٹ پر سینیٹ کا رکن منتخب کیا گیا، جہاں وہ قائدِ ایوان کے طور پر خدمات انجام دیتے رہے۔
