بھارتی ریاست آسام کے ضلع گولپارہ میں بھارتی حکومت کی انسداد تجاوزات مہم کے دوران متعدد مسلمانوں کے گھروں کو مسمار کر کے انہیں بے گھر کر دیا گیا ہے۔
کشمیر میڈیا سروس کے مطابق تقریباً 153 ہیکٹر زمین پر قبضے کے الزام میں یہ کارروائی کی جا رہی ہے، جس کے نتیجے میں تقریباً 580 مسلم خاندان متاثر ہوئے ہیں۔
بی جے پی آسام کے جنرل سیکریٹری پلب لوچن داس کی جانب سے جاری کردہ ویڈیوز میں بھارتی فورسز کی موجودگی میں بھاری مشینری سے گھروں کو گرتے ہوئے دیکھا جا سکتا ہے۔
اس آپریشن میں محکمہ جنگلات اور پولیس کے ایک ہزار سے زائد اہلکار شامل ہیں اور اسے کئی دنوں تک جاری رکھنے کی توقع ہے۔
وزیر اعلیٰ ہمانتا بسوا سرما نے سوشل میڈیا پر اعلان کیا تھا کہ وہ جنگلاتی زمین کی حفاظت اور واگزاری کے لیے پرعزم ہیں۔ ضلعی حکام کا کہنا ہے کہ کارروائی غیر قانونی قبضے کے خلاف ہے، تاہم ناقدین اس اقدام کو بھارتی سپریم کورٹ کے اصولوں کی خلاف ورزی قرار دے رہے ہیں اور متاثرہ خاندانوں کے لیے بحالی پروگرام کا فقدان ہے۔
مقامی لوگوں اور ناقدین کے مطابق یہ کارروائی مخصوص مذہبی برادری کے خلاف انتقام یا ڈیموگرافک مقصد کے تحت کی جا رہی ہے، جبکہ دیگر مذاہب کے لوگوں پر یہ اثر نہیں پڑا۔
متاثرہ خاندانوں نے اسے امتیازی سلوک اور متعصبانہ حملہ قرار دیا ہے، جس میں زمین کی واگزاری کی آڑ میں ہزاروں افراد راتوں رات بے گھر ہو گئے ہیں۔ یہ واقعہ آسام میں بڑھتے ہوئے فرقہ وارانہ تعصب اور مسلمانوں کو نشانہ بنانے کی عکاسی کرتا ہے۔
