عالمی خبر ایجنسی رائٹرز نے دعویٰ کیا ہے کہ چار باخبر ذرائع کے مطابق امریکا اور ایران کے مذاکراتی وفود رواں ہفتے کے آخر میں دوبارہ اسلام آباد کا دورہ کریں گے، جہاں دونوں ممالک کے درمیان امن مذاکرات کے اگلے دور کی تیاری کی جا رہی ہے۔
رائٹرز کے مطابق یہ پیش رفت خطے میں جاری کشیدگی کم کرنے اور سفارتی روابط بحال کرنے کی ایک اہم کوشش سمجھی جا رہی ہے۔ اگرچہ ابھی تک سرکاری سطح پر مکمل تفصیلات سامنے نہیں آئیں، تاہم مذاکراتی عمل کی بحالی کو ایک مثبت اشارہ قرار دیا جا رہا ہے۔
ذرائع کے مطابق دونوں ممالک کے وفود گزشتہ مذاکراتی عمل کے تسلسل میں دوبارہ اسلام آباد میں ملاقات کریں گے، جہاں سیکیورٹی، علاقائی استحکام اور باہمی اختلافات کے حل پر بات چیت متوقع ہے۔
یہ مذاکرات ایسے وقت میں ہو رہے ہیں جب امریکا اور ایران کے درمیان تعلقات ایک بار پھر کشیدہ صورتحال سے گزر رہے ہیں۔
تجزیہ کاروں کے مطابق رائٹرز کی رپورٹ میں سامنے آنے والی یہ پیش رفت اگر حقیقت کا روپ دھارتی ہے تو یہ خطے میں امن کی کوششوں کے لیے ایک اہم سنگ میل ثابت ہو سکتی ہے، تاہم مذاکرات کی کامیابی کا انحصار دونوں فریقین کے سیاسی ارادوں اور باہمی اعتماد کی بحالی پر ہوگا۔
