واشنگٹن: وائٹ ہاؤس کے سابق اعلیٰ عہدیدار رام ایمانوئل نے اسرائیلی وزیراعظم بنیامین نیتن یاہو کی پالیسیوں پر سخت تنقید کرتے ہوئے کہا ہے کہ ان کے فیصلوں نے اسرائیل کو سفارتی اور سیاسی طور پر ایک ایسے مقام پر پہنچا دیا ہے جہاں وہ عالمی سطح پر تنہائی کا شکار ہو چکا ہے۔
اسرائیلی میڈیا کو دیے گئے انٹرویو میں رام ایمانوئل نے کہا کہ نیتن یاہو نے قومی سلامتی اور خارجہ پالیسی کو جس انداز میں چلایا، اس کے نتیجے میں اسرائیل کو شدید سفارتی نقصان پہنچا ہے۔ ان کے بقول آج اسرائیل اور امریکا کے درمیان طویل عرصے سے قائم اسٹریٹجک اتحاد بھی ایک نازک مرحلے میں داخل ہو چکا ہے۔
انہوں نے دعویٰ کیا کہ اسرائیل نہ صرف اپنے سب سے اہم اتحادی امریکا سے دور ہو رہا ہے بلکہ یورپی ممالک کی حمایت بھی کھو چکا ہے، جس کے باعث عالمی سطح پر اس کی سفارتی تنہائی میں اضافہ ہوا ہے۔
رام ایمانوئل نے کہا، "آج اسرائیل ایک ایسی ریاست بنتا جا رہا ہے جو بین الاقوامی سطح پر تنہا کھڑی ہے۔”
انہوں نے طنزیہ انداز میں سوال اٹھایا کہ "یہ کیسا سودا ہے کہ اسرائیل نے اپنی معاشی منڈیاں کھو دیں، اپنا سب سے بڑا سیاسی سرپرست بھی کھو دیا، اور بدلے میں صرف صومالی لینڈ جیسے محدود سفارتی فائدے پر اکتفا کرنا پڑا؟”
سابق امریکی عہدیدار نے یہ دعویٰ بھی کیا کہ نیویارک کے میئر کے امیدوار ظہران ممدانی اس وقت امریکی یہودیوں کے ایک حلقے میں نیتن یاہو سے زیادہ مقبول دکھائی دیتے ہیں، جو اسرائیلی حکومت کی موجودہ پالیسیوں پر بڑھتی ہوئی تنقید کی عکاسی کرتا ہے۔
ان کے یہ بیانات ایسے وقت میں سامنے آئے ہیں جب غزہ جنگ، مشرقِ وسطیٰ کی بدلتی ہوئی صورتحال اور اسرائیل کی خارجہ پالیسی پر امریکا اور یورپ میں مسلسل بحث جاری ہے، جبکہ متعدد مغربی رہنما اسرائیلی حکومت کی حکمت عملی پر کھل کر تحفظات کا اظہار کر رہے ہیں۔
