امریکی صدر ڈونلڈ ٹرمپ نے کہا ہے کہ آبنائے ہرمز مکمل طور پر کھول دی گئی ہے اور ایران اس حوالے سے انتہائی مثبت اور ذمہ دارانہ کردار ادا کر رہا ہے۔
وائٹ ہاؤس میں میڈیا سے گفتگو کرتے ہوئے صدر ٹرمپ نے کہا کہ آبنائے ہرمز میں جہازوں کی آمدورفت معمول کے مطابق بحال ہو چکی ہے اور خطے میں استحکام کے لیے اہم پیش رفت سامنے آئی ہے۔
انہوں نے خبردار کیا کہ اگر ایران معاہدے کی شرائط پر عمل درآمد نہ کرے تو امریکا ضروری اقدامات کرنے سے گریز نہیں کرے گا۔ تاہم ان کا کہنا تھا کہ جب تک ایران امریکا کے ساتھ احترام اور ذمہ داری پر مبنی رویہ برقرار رکھے گا، دونوں ممالک کے درمیان کسی قسم کا تنازع یا مشکل پیدا نہیں ہوگی۔
صدر ٹرمپ نے مزید کہا کہ عالمی برادری کو توقع ہے کہ ایران بڑے پیمانے پر ہتھیاروں سے متعلق معائنوں پر رضامندی ظاہر کرے گا۔ ان کے مطابق ایران مستقبل میں جوہری سرگرمیوں کے حوالے سے طویل المدتی شفافیت کو یقینی بنانے کے لیے بھی آمادہ ہوگا۔
امریکی صدر کے بیان کو ایران اور امریکا کے درمیان جاری سفارتی رابطوں اور خطے میں کشیدگی کم کرنے کی کوششوں کے تناظر میں اہم پیش رفت قرار دیا جا رہا ہے۔
