بھارتی کرکٹ ٹیم کے اوپنر ابھیشیک شرما معدے کے انفیکشن کے باعث تاحال مکمل طور پر صحتیاب نہیں ہو سکے، جس کے باعث ٹی ٹوئنٹی ورلڈکپ میں اتوار کو پاکستان کے خلاف اہم میچ میں ان کی شرکت مشکوک ہو گئی ہے۔
بھارتی میڈیا رپورٹس کے مطابق ابھیشیک شرما کو 6 فروری کو ممبئی میں نیٹ سیشن کے بعد کھانا کھانے کے باعث طبیعت ناساز ہوئی۔
اگلے روز امریکا کے خلاف میچ میں ان کی حالت مزید بگڑ گئی، تاہم انہوں نے میچ کھیلنے کا فیصلہ کیا لیکن بیٹنگ میں خاطر خواہ کارکردگی نہ دکھا سکے اور پہلی ہی گیند پر آؤٹ ہو گئے۔
بعد ازاں ٹیم کے ہمراہ نمیبیا کے خلاف میچ کے لیے نئی دہلی روانہ ہوئے، مگر وہاں معدے کے انفیکشن کے باعث ان کی طبیعت مزید خراب ہو گئی اور انہیں اسپتال منتقل کرنا پڑا۔
جمعرات کو انہیں اسپتال سے ڈسچارج کر دیا گیا، تاہم احتیاطی تدابیر کے تحت نمیبیا کے خلاف میچ میں شامل نہیں کیا گیا۔
نمیبیا کے خلاف میچ کے ٹاس کے موقع پر بھارتی کپتان سوریا کمار یادیو نے کہا کہ ابھیشیک مکمل فٹ نہیں ہیں اور وہ ایک یا دو میچز سے باہر رہ سکتے ہیں۔ ان کے بیان کے بعد پاکستان کے خلاف میچ میں ابھیشیک کی شرکت غیر یقینی دکھائی دے رہی ہے۔
