امریکی میڈیا رپورٹس کے مطابق امریکی سینٹرل کمان (سینٹ کام) نے دعویٰ کیا ہے کہ جنوبی ایران میں فضائی کارروائیاں کی گئی ہیں، جن میں ایرانی ڈرون لانچنگ تنصیبات کو نشانہ بنایا گیا۔
سینٹ کام کے بیان میں کہا گیا ہے کہ امریکی فورسز نے ایران کی اُن تنصیبات پر حملے کیے جو ڈرون آپریشنز کے لیے استعمال ہو رہی تھیں۔ بیان کے مطابق کارروائی کے دوران بارودی سرنگیں بچھانے والی ایرانی کشتیوں کو بھی ہدف بنایا گیا۔
امریکی سینٹرل کمان کا کہنا ہے کہ جاری جنگ بندی کے باوجود امریکی فوج تحمل کا مظاہرہ کر رہی ہے، تاہم امریکی افواج کے دفاع کے لیے ضروری اقدامات جاری رکھے جائیں گے۔
دوسری جانب اس سے قبل جنوبی ایرانی شہر بندر عباس میں متعدد دھماکوں کی آوازیں سنی گئی تھیں، جس کے بعد علاقے میں کشیدگی کی فضا پیدا ہوگئی۔
ایرانی میڈیا نے بعد ازاں دعویٰ کیا کہ بندر عباس میں صورتحال مکمل طور پر کنٹرول میں ہے اور عوام کے لیے تشویش کی کوئی بات نہیں۔
