ایران نے اعلان کیا ہے کہ ملک کے سب سے بڑے توانائی منصوبے ساؤتھ پارس گیس فیلڈ کی گیس پیداوار دوبارہ جنگ سے پہلے کی سطح پر بحال ہوگئی ہے، جسے حالیہ کشیدگی کے دوران شدید خطرات اور تکنیکی مسائل کا سامنا تھا۔
ایرانی حکام کے مطابق جنوبی صوبہ بوشہر میں واقع ساؤتھ پارس گیس فیلڈ میں مرمتی اور تکنیکی کام تیزی سے مکمل کیے گئے، جس کے بعد گیس کی پیداوار معمول کے مطابق دوبارہ شروع کردی گئی ہے۔ حکام کا کہنا ہے کہ توانائی تنصیبات کو محفوظ بنانے کے لیے اضافی سکیورٹی اقدامات بھی نافذ کیے گئے ہیں۔
ایرانی وزارتِ تیل کے مطابق جنگ اور علاقائی کشیدگی کے باعث بعض پیداواری یونٹس عارضی طور پر متاثر ہوئے تھے، تاہم انجینئرنگ ٹیموں اور تکنیکی ماہرین نے مختصر وقت میں نظام بحال کرلیا۔ حکام نے دعویٰ کیا کہ اب پیداوار دوبارہ جنگ سے قبل کی یومیہ سطح تک پہنچ چکی ہے۔
ماہرین کے مطابق ساؤتھ پارس گیس فیلڈ دنیا کے سب سے بڑے قدرتی گیس ذخائر میں شمار ہوتا ہے اور ایران کی معیشت میں ریڑھ کی ہڈی کی حیثیت رکھتا ہے۔ یہ فیلڈ ایران اور قطر کے درمیان مشترکہ گیس ذخائر کا حصہ ہے، جبکہ قطر اسی ذخیرے کو “نارتھ فیلڈ” کے نام سے استعمال کرتا ہے۔
تجزیہ کاروں کا کہنا ہے کہ ساؤتھ پارس کی مکمل بحالی ایران کے لیے ایک اہم معاشی کامیابی ہے، کیونکہ ملک کی توانائی برآمدات، اندرونی صنعت اور بجلی کی پیداوار کا بڑا انحصار اسی منصوبے پر ہے۔
عالمی توانائی منڈیوں میں بھی اس خبر کو مثبت پیش رفت قرار دیا جارہا ہے، کیونکہ ایران کی گیس پیداوار بحال ہونے سے خطے میں توانائی سپلائی سے متعلق خدشات میں کمی آسکتی ہے۔
